Hayatou Mgeni rasmi ufunguzi wa Michuano ya Chalenji

BARAZA la Vyama vya Soka Afrika Mashariki na Kati (CECAFA) na Shirikisho la Mpira wa Miguu nchini Uganda (FUFA), limemteua Rais wa Shirikisho la Soka Afrika (CAF), Issa Hayatou, kuwa mgeni rasmi katika ufunguzi wa michuano ya kombe la Chalenji, itakayoanza Jumamosi, jijini Kampala, Uganda.

Kwa mujibu wa taarifa iliyotolewa jana kwa vyombo vya habari na Afisa Habari wa CECAFA, Rogers Mulindwa, tayari Hayotou, amekubali na atawasili Kampala, akitokea Makao Makuu ya CAF, mjini Cairo, Misri.

Kiongozi huyo wa mpira barani Afrika, anatarajiwa kuwasili jijini Kampala Novemba 22, ikiwa ni moja ya malengo ya CECAFA ya kujiwekea mikakati imara ya maendeleo ya mpira wa miguu katika Ukanda huo.

Hayatou amekubali mwaliko huo, aliotumiwa na Rais wa CECAFA, Leodgar Tenga.

Kwa upande wake Rais wa Shirikisho la Mpira wa Miguu Uganda (FUFA), Lawrence Mulindwa, amesema Uganda inajivunia kuwa mwenyeji wa mashindano hayo.

Katika msafara huo, Hayatou, atafuatana na Maofisa mbalimbali wa CAF, akiwemo Katibu Mkuu, Hicham El Amrani. Wengine watakaofuatana na Rais huyo wa CAF, ni Mohamed Raouraoua, Constant Omari na Ngangue Appolinaire, ambapo mara baada ya kuwasili Kampala, Hayatou, atakutana na viongozi wa ngazi za juu wa FUFA.

Akiwa nchini Uganda, Rais huyo wa CAF, atahudhuria kikao cha Baraza la CECAFA, litakalofanyika Ijumaa kwenye hoteli ya Serena, kabla ya kuanza kwa michuano hiyo, itakayofanyika kwenye Uwanja wa Namboole.

Hayatou pia atahudhuria sherehe iliyoandaliwa maalum kwa ajili yake, katika Ukanda wa CECAFA na Uganda kwa ujumla.

Uganda ambao ni wenyeji wa michuano hiyo, watachuana na jirani zao, Kenya, katika mechi ya ufunguzi Jumamosi