USAFI KATIKA BAADHI YA MITAA BADO KUTEKELEZWA KWA UHAKIKA

Agizo la Rais John Magufuli alilolitoa la kufanya usafi siku ya Uhuru Desemba mwaka jana limeitikiwa na wananchi wengi kote nchini

Sote ni mashahidi Rais kwa  mamlaka aliyonayo aliamua kufuta sherehe za maadhimisho ya Uhuru na yeye mwenyewe kuamua siku hiyo hiyo iwe ni siku ya kufanya usafi nchini kote nay eye mwenyewe kushiriki katika eneo la Feri lililopo karibu na Ikulu ya Dar es Salaam

Tulishuhudia siku hiyo viongozi mbalimbali akiwemo, Rais mstaafu wa awamu ya nne, Jakaya Kikwete naye aliungana na watanzania kufanya usafi eneo la Msoga Chalinze mkoani Pwani.

Mpaka sasa swala la kufanya usafi linaendelea kama tulivyoambia na Wizara husika inayoshulikia mazingira kwamba kila jumamosi ya mwisho wa mwezi itakuwa rasmi siku ya kufanya usafi

 Maana yake ni kwamba kila mtaa, kata, tarafa watakuwa wamejipanga ni kwa namna gani wanavyolishughulikia swala la usafi ili kuona mazingira yanakuwa safi

 Sasa tatizo lililopo ni kwamba kweli watu wanashiriki katika swala la usafi kwa kuzikusanya taka ambazo baadaye huwa zinatakiwa kubebwa kupelekwa dampo, lakini mara nyingi utembeapo katika barabara zetu unakuta taka zimerundikwa unaweza ukaambiwa hizi taka sasa ni wiki kutoka zilundikwe hapa, kazi iliyobaki ni kwa viongozi wa mitaa kuweka utaratibu wa kuzibeba na kuzipeleka kunakohusika lakini bila kufanya hivyo tatizo la uchafu litarudi palepale