KUTOKA BUNGENI MFUMO WA BIMA YA AFYA KUBADILISHWA

Serikali imeuagiza mfuko wa Bima ya Afya kubadilisha mfumo wa vitambulisho vya Bima ya Afya ili kuongeza uthibiti wa udanganyifu  unaofanyika ndani ya mfumo uliopo.

Hayo yameelezwa na Naibu Waziri wa Afya na Ustawi wa Jamii Mhe. Dkt. Seif Seleman Rashidi alipokuwa akijibu swali lililoulizwa na Mhe. Mariam Kisangi (CCM Viti Maalumu) na kuongeza kuwa Wizara inafahamu udanganyifu unaofanyika hivyo inashirikiana na  Mfuko wa Bima ya Afya ili kuhakikisha udanganyifu huo una dhibitiwa.

Ubadilishaji wa mfumo huo pia umelenga katika kubadilisha vitambulisho vya sasa ili kuwa na aina bora zaidi inayotumia teknolojia mpya ya utambuzi na kuimarisha usimamizi wa huduma katika vituo vilivyosajiliwa na Mfuko hasa vituo vikubwa vilivyopo Dar es Salaam.

Alisema baadhi ya wanachama wamekuwa sio waaminifu kwa kuuza nafasi zao au kuingiza majirani badala ya kujaza wategemezi wanaostahili kisheria .Aidha alisema wapo wanaoshirikiana na watoa huduma wasio waaminifu na kuingiza watu wenye magonjwa sugu na yenye gharama kubwa na kutolea mfano wa magonjwa ya saratani.

Naibu Waziri alisema kwa mfumo wa sasa eneo la wategemezi linalenga wategemezi halisi wa wanachama kwa mujibu wa taratibu za Utumishi wa Umma.

Hata hivyo alisema Mfuko huo uko makini katika kuhakikisha unatoa huduma stahili kwa wateja wake na kwa wale walioandikishwa kama wategemezi hadi pale utaratibu mpya utakapopitishwa rasmi .

Akieleza manufaa ya mfuko huo alisema msingi mkubwa wa Bima ya Afya za Jamii ni kuwezesha mwanachama kutibiwa kulingana na tatizo au ugonjwa unaomsumbua bila kujali michango yake.

Alisema dhana ya bima ya afya imejengeka katika misingi ya kuchangiana ,ambapo mwenye familia ndogo bila wategemezi anawasaidia wenye familia kubwa . Mwenye mshahara mkubwa husaidia wenye mishahara midogo na vijana wanawasaidia wazee.

Aidha Dkt.Seif alisema Wizara inasubiri ushauri kutoka ofisi ya Mwanasheria Mkuu wa Serikali kuhusu suala hili na inaendelea kutoa elimu kwa wananchi juu ya umuhimu wa Bima ya Afya na utendaji kazi wa vitambulisho hivyo.