TAMKO LA WAZIRI WA NCHI, OFISI YA MAKAMU WA RAIS, MAZINGIRA MHE. DKT. TEREZYA LUOGA HUVISA (MB) KUHUSU MAADHIMISHO YA SIKU YA MAZINGIRA DUNIANI MWAKA 2013 YATAKAYOFANYIKA MKOANI RUKWA.

 Naibu Waziri, Ofisi ya Makamu wa Rais, Charles Kitwanga.

Ndugu wananchi,

Jumatano tarehe 5 Juni, 2013 Watanzania tutaungana tena na mataifa mengine kuadhimisha Siku ya Mazingia Duniani.  Siku ya tarehe 5 Juni iliamuliwa kuwa Siku ya Mazingira Duniani kwa Azimio la Baraza la Umoja wa Mataifa la mwaka 1972 ikiwa ni kielelezo cha ufunguzi wa mkutano wa kwanza wa Umoja wa Mataifa kuhusu Mazingira uliofanyika huko Stockholm, Uswidi.

Aidha, Azimio la kuunda Shirika la Umoja wa Mataifa la kushughulikia Mazingira Duniani, yaani UNEP, pia lilipitishwa siku hiyo. Kama mnavyojua, UNEP ni chombo pekee cha Umoja wa Mataifa chenye makao makuu yake katika bara la Afrika, huko Nairobi Kenya. Tangu tarehe 5 Juni, 1973, nchi mbalimbali zaidi ya 140 huadhimisha siku hii kila mwaka.

Lengo letu kubwa katika kuadhimisha siku hii kama Taifa ni kuweka msisitizo katika masuala ya mazingira na kuwapa uwezo wananchi ili wawe mawakala wazuri wa maendeleo endelevu.  Vile vile maadhimisho haya hutoa nafasi muhimu ya kutafakarikuhusu hali na umuhimu wa mazingira kwa nchi yetu, kuelimishana na kukuza ari ya wananchi kushiriki katika shughuli za hifadhi na usimamizi wa mazingira yao.

Maadhimisho ya Siku ya Mazingira Duniani kitaifa kwa mwaka huu yatafanyikia Mkoani Rukwa, na kimataifa yatafanyikia nchini Mongolia.

Ujumbe wa mwaka huu wa Siku ya Mazingira Duniani ni: “Fikiri, Kula: Hifadhi Mazingira” au kwa lugha ya Kiingereza ”Think – Eat – Save”. Ujumbe huu unatukumbusha na kutuhimiza tutimize wajibu wetu ipasavyo kwa kuhakikisha kuwa shughuli tunazofanya za uzalishaji mali na utoaji wa huduma zinakuwa rafiki wa mazingira  na zisiwe chanzo cha uharibifu wake.  Hapa nchini ujumbe unaoongoza maadhimisho ya mwaka huu ni  “Fikiri, Kabla ya Kula: Hifadhi Mazingira”

Ndugu wananchi,

Madhumuni yangu leo ni kuwaombeni wananchi wote kuienzi Siku ya Mazingira Duniani kwa kufanya yafuatayo:-

Þ   Kufanya usafi kwenye maeneo ikiwa ni pamoja na kufagia na kuzoa taka na kuzitupa kwenye maeneo yaliyotengwa,

Þ   Kufyeka vichaka vinavyozunguka makazi yetu,

Þ   Kuchimba vyoo vya kudumu na kuvitumia,

Þ   Kuzibua mifereji na mitaro ya maji taka,

Þ   Kufukia madimbwi ya maji,

Þ   Palipo na mvua na maji ya kutosha, kupanda nyasi na miti inayofaa kwenye maeneo yanayotuzunguka hasa yale maeneo kame,

Þ   Kusafisha visima na vyanzo vya maji,

Þ   Kusafisha maeneo ya maji kwa ajili ya mifugo, na

Þ   Kutoa zawadi kwa washindi wa mashindano ya usafi wa miji na majiji chini ya utaratibu wa Wizara ya Afya na Ustawi wa Jamii.

Ndugu wananchi,

Katika kutekeleza hayo niliyoyataja, wananchi mnayo nafasi ya kuchagua aina ya mchango wa ushiriki wenu katika sherehe hizi, na namna mtakavyoona inafaa kuutoa.  Vile vile napenda kutoa  wito kwenu wananchi wote mnaoishi mjini na vijijini, mashirika ya umma, mashirika ya kiserikali na yasiyo ya kiserikali, sekta binafsi, viwanda na taasisi za elimu na utafiti kushiriki katika maadhimisho haya katika maeneo yenu.  Jukumu la hifadhi na usalama wa mazingira ni letu sote, wazee kwa vijana, wake kwa waume.  Mafanikio yatatagemea juhudi za kila mmoja wetu anavyoshiriki katika shughuli za kuhifadhi mazingira.  Natoa wito kwamba, kuanzia tarehe 1 hadi 4 Juni, ziwe ni siku mahsusi kwa ajili ya kufanya shughuli za usafi  na shughuli nyinginezo zinazolenga kulinda na kuhifadhi ya mazingira ya makazi yetu, mitaa inayotuhusu, vijiji vyetu, miji na majiji yetu.

Baada ya kusema haya, napenda kutumia nafasi hii kuwashukuru sana wale wote ambao wamejipanga kutekeleza shughuli mbalimbali za kuadhimisha Siku ya Mazingira Duniani.  Naushukuru uongozi wa mkoa wa Rukwa, kwa kukubali kuwa mwenyeji wa maadhimisho haya kitaifa.  Pia nazipongeza Halmashauri za wilaya na Mashirika yasiyo ya Kiserikali, Taasisi na wananchi wote kwa ujumla kwa ushirikiano wanaouonesha katika maandalizi ya maadhimisho haya.