amanitanzania

Kocha wa Taifa Stars, Kim Poulsen aksisitiza jambo wakati wa mkutano na waandishi wa habari wa Tanzania, mjini Kampala jana kuhusu mechi ya leo ya kufuzu kucheza michuano ya CHAN dhidi ya Uganda Cranes inayotarajiwa kuchezwa kwenye Uwanja wa Namboole mjini humo. Wengine ni Kocha Msaidizi, Sylvester Marsh (kulia) na Ofisa Habari wa Shirikisho la Soka Tanzania (TFF), Boniface Wambura.

 

Wakati Taifa Stars inashuka dimbani kesho, Jumamosi dhidi ya Uganda Cranes kutafuta tiketi ya kucheza fainali za CHAN mwakani, kocha wa Stars, Kim Poulsen amesema kazi kubwa kesho ni kutangulia kufunga.

Taifa Stars, inayodhaminiwa na Bia ya Kilimanajro Premium Lager inaingia dimbani ikiwa nyuma kwa bao moja baada ya kufungwa na Cranes 1-0 wiki mbili zilizopita Jijini Dar es Salaam.

Akizungumza na waandishi wa habari Jijini Kampala jana, Poulsen alisema wachezaji wote wamejiandaa vizuri na licha ya kuwa ni mwezi mgumu katika mpira kwani baadhi ya wachezaji wamefunga, wachezaji wamepania kupata matokeo mazuri.

“Tunajua watanzania wengi walikataa tama au kupoteza matumanini baada ya sisi kufungwa 1-0 lakini katika mpira haya yanaweza kubadilika…tukifunga bao kesho litabadilisha kila kitu,” alisema Poulsen.

Alikiri kuwa mechi hii ya marudiano ni ngumu kwani Stars itakuwa inacheza na timu bora Afrika Mashariki lakini lolote linaweza kutokea ndani ya dakika 90 au zaidi za mchezo.

Alisema licha ya kuwakosa wachezaji Shomari Kapombe na Mwinyi Kazimoto, maandalizi ni mazuri na hasa walipokuwa kambini Mwanza wachezaji walionesha bidii sana katika mazoezi.

Alisema katika mechi ya kesho watajitahidi kutengeneza nafasi nyingi na kufunga magoli. “Katika mazoezi yetu tumefanya mazoezi sana katika ushambuliaji, kutengeneza nafasi na kufunga magoli,”alisema huku akiongeza kuwa mabeki watahakikisha washambuliaji wa The Cranes hawapiti kabisa.

Aliwataka watanzania wawe na imani na timu ya Taifa kwa matokeo yoyote yatakayopatikana kesho kwani mpira ni safari na kukubali matokeo ni sehemu ya mchezo.

“Wachezaji wana ari ya kupata ushindi ili waende CHAN mwakani kwani hii itawapa nafasi nzuri ya kuonekana na vilabu kubwa duniani na tayari tumeona jinsi watu wengi wametambua kuwa kuna wachezaji wazuri Tanzania….Kapombe ameenda kwenye majaribio Uholanzi, Kyemba naye yuko njiani na nasikia Kazimoto yuko Qatar..nawatakia kila la heri.” Alisema.

Poulsen alisema Jumatatu atazungumza na waandishi wa habari kuhusu mipango ya muda mrefu ya Taifa Stars.

Akizungumza Jijini Dar es Salaam, Meneja wa Bia ya Kilimanjaro Premium Lager, George Kavishe, ambaye Bia yake inadhamini Taifa Stars alisema wao kama wadhamini wanawaomba watanzania wawe na imani na stars na waiombee ifuzu mashindano ya CHAN.

“Sisi kama wadhamini tuna imani na timu yetu na tuna imani watafanya maajabu katika mechi ya kesho ili wawape raha watanzania,” alisema Kavishe.

Kilimanjaro Premium Lager imewekeza zaidi ya shilingi bilioni 2 kwa mwaka kuidhamini timu ya Taifa kwa mkataba wa miaka mitano.