MADHARA YA POMBE

Na Lydia Churi, MAELEZO-DODOMA  

                         

Watu milioni mbili hufariki kila mwaka na asilimia nne ya matatizo ya kiafya duniani hutokana na matumizi ya pombe.

Akijibu swali bungeni mjini Dodoma Naibu Waziri wa Afya na Ustawi wa Jamii Dkt. Seif Seleman Rashidi alisema Serikali inawataka watanzania kutokutumia pombe kupita kiasi kwa kuwa ina madhara kwa afya zao, familia na taifa kwa ujumla.

Alisema utafiti unaonyesha kuwa tatizo hili ni baya zaidi katika nchi zinazoendelea kutokana na hali mbaya ya uchumi na ustawi wa jamii inayochangiwa na magonjwa ya Malaria, Kifua Kikuu na Ukimwi.

Alisema utafiti uliofanyika nchini kati ya Februari na Oktoba 2012 kuhusu viashiri vya magonjwa yasiyo ya kuambukiza umebaini kuwa asilimia 26.8 hadi 31.9 ya wananchi wanatumia pombe na kati ya hao asilimia 27.4 ya wanaume ni walevi wa kupindukia na wanawake ni asilimia 13.4.

 Dkt. Rashidi alisema kutokana na kuongezeka kwa athari zinazotokana na matumizi ya pombe hasa kwa magonjwa yasiyo ya kuambukiza, Serikali inatekeleza mkakati wa kukabiliana na magonjwa yasiyo ya kuambukiza ambao unaelekeza kuhusu kutoa elimu kwa wananchi kupitia njia mbalimbali.

Alisema Serikali imeanzisha utaratibu wa kuziwezesha hospitali za rufaa za mikoa kuanza kutoa huduma kwa waathirika wa matumizi ya dawa za kulevya na pombe. Aliongeza kuwa hivi sasa hospitali za kanda pia zimejiimarisha katika kutibu magonjwa yasiyo ya kuambukiza ikiwa ni pamoja na waathirika wa magonjwa wa matumizi ya pombe.